បន្ទាយមានជ័យ៖ ក្រុមគណៈកម្មការចម្រុះដឹកនាំដោយរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោក លាង មុន្នីរិទ្ធ រួមនឹង លោកអភិបាលខេត្តបន្ទាយមានជ័យ អ៊ុ រាត្រី បានចុះពិនិត្យតាមតំបន់ព្រៃលិចទឹក ជាប់បឹងទន្លេសាប ក្នុងភូមិសាស្ត្រស្រុកចំនួន០២នៃខេត្តបន្ទាយមានជ័យ គឺស្រុកព្រះនេត្រព្រះ និងស្រុកមង្គលបូរី នៅព្រឹកថ្ងៃទី៣០ ខែវិច្ឆិកា ឆ្នាំ២០២១នេះ។
ការចុះពិនិត្យតំបន់ព្រៃលិចទឹកនេះ គឺពិនិត្យបង្គោលព្រំដីព្រៃលិចទឹកតំបន់៣ ក្នុងភូមិសាស្ត្រឃុំប្រាសាទ ឃុំភ្នំលៀប នៃស្រុកព្រះនេត្រព្រះ និងឃុំសំបួរ ស្រុកមង្គលបូរី នៃខេត្តបន្ទាយមានជ័យ ។
លោក អ៊ុ រាត្រី អភិបាលខេត្តបន្ទាយមានជ័យ បានបញ្ជក់ឲ្យដឹងនៅចំនុចដែលក្រុមការងារចុះដល់បង្គោលលេខ៧ នៃបង្គោលកំណត់ព្រំដីតំបន់៣នេះថាដីព្រៃលិចទឹកក្នុងតំបន់៣ ដែលកំណត់ដោយរដ្ឋាភិបាល នៅខេត្តបន្ទាយមានជ័យមានប្រមាណជាង ១២ ០០០ហិចតា(១២ពាន់)។ ការពិនិត្យនេះផងដែលគឺដើម្បីស្វែងរកអ្នកពាក់ព័ន្ធ កាន់កាប់ខុសច្បាប់ឈានដល់ការបង្រ្កាប អនុវត្តទោសតាមច្បាប់និងដកហូតយកមកវិញ នូវដីព្រៃលិចទឹក ដែលត្រូវបានជនខិលខូច ទន្ទ្រានកាន់កាប់ដោយខុសច្បាប់។
គួរំលឹកផងដែរថា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានដាក់ចេញវិធានការក្ដៅកាលពីថ្ងៃទី២៨ ខែវិច្ឆិកា បន្ទាប់ពីសម្ដេចទទួលបានរបាយការណ៍ពីប្រធានរាជបណ្ឌិត្យសភាកម្ពុជាលោកបណ្ឌិត សុខ ទូច ពាក់ព័ន្ធនឹងការកាប់ទន្ទ្រាន និងឈូសឆាយដីលុបបឹងទន្លេសាប។ សម្ដេចបានបញ្ជាឱ្យរឹបអូសទ្រព្យសម្បត្តិជនល្មើសនៃអំពើនេះ និងជំរុញឱ្យជនល្មើសដែលទន្ទ្រានដីទឹកបឹងទន្លេសាបឱ្យចេញមុខមកសារភាពដើម្បីទទួលបានការបន្ថូរបន្ថយទោសផងដែរ។
បើតាមសម្ដេចតេជោ ដីដែលរឹបអូសបានមកវិញនេះនឹងត្រូវអភិរក្សដើម្បីដាំដើមឈើ ព្រៃលិចទឹកសាជាថ្មីឡើងវិញដើម្បីជាប្រយោជន៍ធនធានធម្មជាតិ ជំរកត្រី និងប្រព័ន្ធអេកូឡូស៊ី៕